የኢትዮጵያ ቀይ መስቀል ማኅበር በመላው ሀገራችን የችግኝ ተከላ መርሃ-ግብር እየተሳተፈ ነው

ቅዳሜ ሐምሌ 17 ቀን 2013 ዓ.ም ከ 300 በላይ የሚሆኑ የኢትዮጵያ ቀይ መስቀል ማኅበር ዋና መ/ቤት እና የአዲስ አበባ ቅርንጫፍ ጽ/ቤት ሠራተኞች፣ በጎ ፈቃደኞችና አባላት በአቃቂ ቃሊቲ ክፍለ ከተማ ወረዳ 9 ልዩ ስሙ ኮዬፈጬ አደባባይ ተብሎ ሠራተኞች፣ በጎ ፈቃደኞችና አባላት በአቃቂ ቃሊቲ ክፍለ ከተማ ወረዳ 9 ልዩ ስሙ ኮዬፈጬ አደባባይ ተብሎ በሚጠራው ቦታ ላይ ችግኞችን ተክለዋል፡፡

በዕለቱ በቦታው ተገኝተው መልዕክት ያስተላለፉት የኢትዮጵያ ቀይ መስቀል ማኅበር ዋና ፀሐፊ አቶ ጌታቸው ታዓ እንደተናገሩት ማህበሩ ከአደጋ ምላሽ ስራዎች ጎን ለጎን የሰው ልጆችን ህይወት በዘላቂነት ለማሻሻል የሚያግዙ የልማት ተግባራትንም ያከናውናል፤ በተለይም የተፈጥሮ አደጋዎችን ለመከላከል የሚያስችሉ ስራዎች ላይ መሳተፍ ቀይ መስቀል ከተቋቋመለት የሰው ልጆችን ስቃይ የመቀነስ ዓላማ ጋር በቀጥታ የሚገናኝ በመሆኑ በባለቤትነት ስሜት ትኩረት ሰጥተን የምናከናውነው ተግባር ነው ብለዋል፡፡

የደን ልማትን በተመለከተ የኢትዮጵያ ቀይ መስቀል ማኅበር በግንባር ቀደምትነት የሚጠቀስና የረጅም ጊዜ ልምድ ያለው ሲሆን በሃገራችን ተከስተው የነበሩትን ድርቅና ረሃብ፤ እንዲሁም የተፈጥሮ አካባቢ መራቆትን ለመግታት ከ1970ዎቹ ጀምሮ የማህበሩ በጎፈቃደኞች፣ አባላትና ሠራተኞች በወሎ፣ በትግራይ፣ በጎጃምና በሌሎችም የሃገሪቱ አካባቢዎች ችግኞችን በመትከል በደን ልማትና የአካባቢ ጥበቃ ስራ ላይ አዎንታዊ አሻራቸውን አሳርፈዋል፡፡

በዘንድሮው መርሃ ግብር በሁሉም ክልሎች የሚገኙ፤ የማኅበሩ ሠራተኞች፣ አባላት እና በጎ ፈቃደኞች በዚህ የኢትዮጵያን እናልብሳት ችግኝ ተከላ መርሃ ግብር በመሳተፍ ላይ ይገኛሉ፡፡